Ջամայկա

Վիքիպեդիայից՝ ազատ հանրագիտարանից
Ճամայկա կամ Ջամայկա(անգլ.՝ Jamaica), կղզի-պետություն Կենտրոնական Ամերիկայում։ Մեծ Բրիտանիայի նախկին գաղութ։ Ընդգրկված է բրիտանական համընկերության մեջ։ Մայրաքաղաքն է Քինգստոնը։

Անվանում

Հնագույն բնակիչները եղել են արավակների հնդկացիական ցեղերը։ Նրանց կղզին անվանում էին Հայմակա («Աղբյուրների կղզի»․ լավ ջրի առկայության համար)։ 1494 թվականին Քրիստափոր Կոլումբոսը հայտնաբերեց կղզին և այն՝ ի պատիվ Իսպանիայի թագավորական ընտանիքի, անվանեց Ֆերդինանդի և Իզաբելայի կղզի։ Բայց այդ անվանումը չարմատավորվեց և պահպանվեց հնդկացիական անվանումը՝ Ճամայկա ձևով[2]։

Ջամայկայի պետական կառուցվածք

Մինչև 1962 թ. Ճամայկան գտնվում էր Անգլիայի տիրապետության տակ։ 1962 թ. օգոստոսի 6-ին ձեռք է բերում անկախություն։ Գործում է Սահմանադրություն (1997 թ. ռեֆորմով և փոփոխություններով)։ Պետության պաշտոնական ղեկավարը համարվում է բրիտանական միապետը՝ Մեծ Բրիտանիայի թագուհի Եղիսաբեթ II-ը, ներկայացված գեներալ-նահանգապետի կողմից, ով նշանակվում է Ճամայկայի վարչապետի խորհրդով։ Գեներալ-նահանգապետը ստորագրում է բոլոր օրենսդրությունները և նշանակում վարչապետ։ Գեներալ-նահանգապետին կից գործում է կոնսուլտատիվ հիմնարկ՝ բաղկացած 6 հոգուց - Գաղտնի խորհուրդ։ Գեներալ-նահանգապետը վարչապետի խորհրդով նշանակում է նաև կառավարության անդամներին։

Բնակչություն

Ճամայկայի բնակչությունը 2004 թ. հուլիսի դրությամբ կազմում էր 2 միլիոն 713 հազ. 130 մարդ, բնակչության խտությունը 1 քառ. կմ. կազմում էր 243 մարդ։ Ճամայկայի բնակչության միջին տարիքը 26,8-ն է, 28,2 % կազմում են 14 տարեկանից ցածր, 65 % 14-ից մինչև 64 տարեկան 6,9 % բարձր 65-ից։